«Чӑваш чӗлхи ... пирӗншӗн вӑл асаттесен пехилӗ, асаннесен кӗлли,

пирӗншӗн вӑл вӑрман сулхӑнӗ, тӑп-тӑрӑ ҫӑлкуҫ шывӗ, пирӗншӗн вӑл чӗре таппи, чун хавалӗн чи ачаш хусканӑвӗсем,

пирӗншӗн вӑл пурнӑҫ...»

(Геннадий Волков)

Ака уйăхĕн 25-мĕшĕ – Чăваш чĕлхи кунĕ. Чăваш чĕлхи – тĕрĕк чĕлхисен пăлхар ушкăнне кĕрекен пĕртен-пĕр чĕрĕ чĕлхе. Чăваш Республикинче патшалăх чĕлхиcенчен пĕри шутланать.

Тăван чĕлхе кунне халалласа Кÿстÿмерти вăтам шкулта тĕрлĕрен мероприятисем иртрĕç. Ака уйăхĕн 13-мĕшĕнче 5-11 классенче вĕренекенсем «Чечеклен, манăн Чăваш Ен» конкурса хастаррăн хутшăнчĕç, тĕрлĕ енлĕ ыйтусем çине хуравларĕç. Акан 15-мĕшĕнче «Чăваш пики-2022» ăмăрту иртрĕ. Конкурса тĕрлĕ класра вĕренекен 6 пике хутшăнчĕ. Хÿхĕм те илĕртÿллĕ чăваш хĕрĕсем куракансене чăваш чĕлхине, культурине тата унăн историне аван пĕлнипе тыткăнларĕç. Тупăшура «Чăваш пики – 2022» ята 11-мĕш класра вĕренекен Измакова Алина тивĕçрĕ. Республика шайĕнче иртекен акцисенче те шкул ачисем хаваспах хутшăнчĕç. 5-мĕш класра вĕренекен Фуражкина Дина «Эпĕ чăвашла калаçатăп» акци вăхăтĕнче илемлĕ сăвă вуласа хавхалантарчĕ. Ака уйăхĕн 25-мĕшĕнче чăвашлăх  туйăмĕ  тапса  тăракан  хастарсем «Пĕтĕм чăваш диктанчĕ» акцие хутшăнчĕç.  Атте –анне панă чĕлхе вăрттăнлăхĕ  хăш шайра пулнине тĕрĕслерĕç.